Во светот починаа над еден милион луѓе од последиците на Ковид-19
Foto

Во светот починаа над еден милион луѓе од последиците на Ковид-19

Бројот на починати во светот од новиот коронавирус денеска надмина еден милион лица, пробивајќи ја новата психолошка граница во пандемијата што ја уништи глобалната економија, преоптовари здравствени системи и го смени начинот на живот.

Со новиот коронавирус досега се заразени над 33,26 милиони луѓе ширум светот, а од последици на Ковид-19 починаа 1.000.010 лица.

Врз основа на септемврискиот просек, за 24 часа во светот од Ковид-19 умираат повеќе од 5,4 илјади луѓе, односно 226 лица во еден час или секои 16 секунди умира по еден заболен од оваа болест.

Откако беа регистрирани првите случаи на коронавирус во Кина во декември 2019 година, тој се прошири во повеќе од 210 земји и територии во светот.

Бројот на смртни случаи од ефектите на коронавирус оваа година сега е двојно поголем од бројот на луѓе кои умираат од маларија секоја година.

0 Коментари

Остави коментари