Нов сучај на семејно насилство, овој пат во скопската населба Кисела Вода... Полицијата лиши од слобода 56 годишен скопјанец, под сомнение дека со пиштол се заканувал на својата 48-годишна сопруга и нивните три ќерки на возраст од 26, 24 и 18 години. Според информациите, во инцидентот физички била нападната 24-годишната ќерка.

Веста ја потврди и министерот за внатрешни работи, Панче Тошковски, кој истакна дека потенцијалниот сторител е задржан во полициска станица, а во соработка со Јавното обвинителство ќе се отвори предмет за целосно истражување на настанот.

Од Основното јавно обвинителство потврдија дека е отворен предмет и дека се преземаат сите законски мерки во врска со случајот.

Ова е втор сериозен инцидент на семејно насилство во Скопје само во текот на неколку дена. Претходно, јавноста беше сведок на самоубиството на мајка и ќерка во скопската населба Тафталиџе, кои се фрлија од висококатница по претходни пријави за тортура и семејно насилство. Случајот отвори широка јавна дебата за потребата од ефикасна заштита на жртвите и за спроведување на законските механизми против семејно насилство.

Инаку, според информациите од семејството, инцидентот се случил по претходна расправија во домот, а насилното однесување продолжило и неколку дена подоцна, кога повторно се заканувал со оружје кон сопругата, но бил спречен од ќерките.