Незадоволни од понудените откупни цени, на стартот од новата откупна сезона на познатата црвена пиперка ајварка, струмичките земјоделци денес повторно излегоа на протест. Преку двочасовна блокада на патот Дабиле – Босилово пред крстосницата кај Робово, тие побараа итен состанок со министерот за земјоделие Борче Серафимовски.

Целта е, како што велат, да се најде трајно решение и да се постигнат фер, одржливи и перспективни откупни цени за црвената пиперка. Разочарани, но и гневни струмичките земјоделци тврдат дека моменталната откупна цена од 25 денари за килограм ајварка е понижувачка и не ги покрива производствените трошоци.

По мирниот протест, министерот за земјоделство, Борче Серафимовски, пак присуствуваше во Струмица и оствари одделни средби со производителите на пиперка и со регистрираните откупувачи – трговци. Серафимовски уверува дека државата не ја диктира пазарната цена, но има обврска да обезбеди законски, транспарентен и предвидлив откуп, притоа да не дозволи трудот на земјоделците да остане незаштитен пред пазарната неизвесност. 

МИНИСТЕРСТВО ЗА ЗЕМЈОДЕЛСТВО, ШУМАРСТВО И ВОДОСТОПАНСТВО

„Цената ја определуваат пазарните услови, но начинот на кој се одвива откупот мора да биде законски, транспарентен и предвидлив. Улогата на Министерството за земјоделство, шумарство и водостопанство е да ги сослуша аргументите на сите страни, да обезбеди почитување на правилата и да придонесе за откуп на пиперката што ќе го вреднува трудот на земјоделците и ќе овозможи непречен пласман.“

Во текот на наредната недела министерот Серафимовски ќе се сретне и со сопствениците на преработувачките капацитети, со кои се очекува да разговара за планираните количини за откуп и можностите за пласман на годинашната реколта на пиперката.

Инаку, земјоделците од Струмичко бараат итно зголемување на откупните цени и истите да важат за целата откупна сезона без еднострано намалување или менување на условите во текот на откупот.