Сеул: Големи воени вежби на САД и Јужна Кореја следната недела

САД и Јужна Кореја следната недела ги започнуваат своите најголеми здружени воени вежби во изминатите неколку години, во момент кога Пјонгјанг ги зголемува тестирањето на оружје и заканите од нуклеарен конфликт кон Сеул и Вашингтон, соопшти јужнокорејската војска.

Сојузничките летни маневри, што ќе се одржат од 22 август до 1 септември во Јужна Кореја, ќе вклучуваат вежби на терен каде ќе учествуваат авиони, воени бродови, тенкови и потенцијално десетици илјади војници.

Официјални лица од Министерството за одбрана во Сеул и воени функционери не соопштија точен број на американски и јужнокорејски војници кои ќе учествуваат во вежбите под името „Ulchi Freedom Shield“, а ќе има и четиридневна програма за обука за цивилна одбрана во Јужна Кореја.

Пентагон денеска соопшти дека САД, Јужна Кореја и Јапонија во близина на бреговите на Хаваите, одржале вежби за предупредување и пребарување и следење балистички проектили, од 8 до 14 август.