Еден ден по пресудата за пожарот во модуларната болница, дел од семејствата на трагично загинатите веќе најавија дека ќе ја обжалат пресудата. Мумин Исмаили, кој во пожарот на 8 септември 2021 година ја загуби својата мајка, за ТВ24 вели оти не е задоволен од условните затворски казни кои ги добија поранешните директори во тетовската болница, а правдата ќе продолжи да ја бара по судските лавиринти.

Во тетовскиот суд вчера беше изречена пресудата за пожарот во модуларната болница во Тетово, а согласно која докторот Бобан Вучевски беше ослободен од обвинение, додека условна казна затвор од година и шест месеци добија поранешните директори на болницата Флорин Бесими и Артан Етеми, а клиничката болница Тетово како правно лице ќе треба да плати отштета од еден милион денари. Судењето за пожарот во модуларната болница во Тетово започна во декември минатата година.