Украинските напади со дронови предизвикаа големи пожари во текот на изминатата ноќ во трговски центар во Мариупол, украински град кој е под руска окупација, и во нафтен магацин во Сочи, на југот од Русија, пренесоа руските Телеграм-канали „Астра“ и „Егиленова Плус“.

Во Мариупол бил уништен трговскиот комплекс „Галактика“, порано познат како супермаркет „Епицентр“ од типот „направи сам“.

Во градот било издадено предупредување за воздушен напад. Ова е четврта продавница од тој синџир која е погодена од август на окупираните територии, по оние во Доњецк, Макиевка и Јенакиево.

Во Сочи, руското одморалиште на Црното Море, нафтениот објект кој веќе беше цел на напад на 4 септември, повторно се запали, пренесуваат „Астра“ и „Егиленова Плус“.

На местото се гледа густ чад, што ги наведе жителите да побараат засолниште, јавија локалните медиуми.

Руските власти не издадоа никакво претходно предупредување ниту го потврдија нападот.