Нема простор за поголема загриженост врз нашата економија од германската рецесија, но сепак треба да бидеме внимателни, предупредуваат дел од економистите. Сметаат дека е тешко да се предвиди колку рецесијата во Германија би влијаела врз нашата, но и економиите од Западен Балкан, а акцентот се става на фактот дека Германија е број еден трговски партнери на земјава.  

Инфлацијата ќе забавува но сепак постојат како внатрешни, така и надворешни ризици што вршат притисок, велат економистите. 

Дека станува збор за комплексно прашање претходно посочи и директорката на Германската стопанска комора во земјава, Антје Ванделт но истовремено истакна дека заинтересираноста на германските компании за македонскиот пазар е голема. А според податоци трговска размена помеѓу Германија и Македонија лани го достигна рекордното ниво, од речиси 4,8 милијарди евра. 

Високата инфлација во Германија ја нарушува потрошувачката и го закочи економскиот раст.  Во првите три месеци од 2023тата  економијата се намалила за 0,3 проценти,  што е и намалување на првичната прогноза за раст од нула проценти. 

По падот за 0,5 проценти во последните три месеци пак,  од 2022, ова е втор последователен квартал на негативен раст на германската економија, што е основа за „техничка рецесија во Германија“.