Покрената истрага за смртта на шестмина заболени од Ковид-19 на Косово
Foto

Покрената истрага за смртта на шестмина заболени од Ковид-19 на Косово

Косовската полиција информира денеска дека е започната истрага за смртта на шест лица заболени од Ковид-19, кои починаа во раните утрински часови во неделата во Инфективната клиника при Клиничкиот и универзитетски центар на Косово.

Во соопштението на полицијата се наведува дека сите починати се косовски државјани и дека телата се предадени на обдукција во Институтот за судска медицина.

Со оглед дека сите шестмина починаа вчера во мошне краток период, во медиумите и во јавноста се појавија шпекулации дека причина за смртта е можен дефект на апартите за оксигенотерапија.

Министерот за здравство на Косово, Арменд Земај по тој повод порача да не се создава конфузија, затоа што лекарите одговорно си ја вршат својата работа.

Тој побара со случајот да се занимаваат експертите, а не истиот да се користи за политички цели.

– Претходните извештаи укажуваат дека лекарите си ја вршат работата чесно, а за техничките прашања да им оставиме да се изјаснат експертите. Секое сомневање треба да се разјасни и да не создаваме конфузија, со оглед дека порастот на бројката на заразени и лошиот биланс на починати за жал се користии за политичка борба, изјави Земај, оценувајќи дека ситуацијата не се развива поразлично одошто во минатите недели.

Минатиот викенд во Косово починаа вкупно 14 заболени од Ковид-19, со што бројот на жртви на новиот коронавирус се искачи на 74. Активни носители на вирусот, според последниот официјален извештај, се 1.532 лица.

0 Коментари

Остави коментари