Под силно полициско обезбедување утринава почна уривањето на најатрактивните градски плажи на охридското крајбрежје. Се отстрануваше платформата пред објектот „Куба Либре“. Претходно им беше исклучена и струјата. Адвокатот на сопствениците вели се урива без решение за такво нешто што е крајно незаконски.

Ваквата акција прави огромна штета не само врз објектите и туризмот, туку и врз животите на сите кои со години работеле и егзистирале од тие работни места кои сега ќе ги изгубат додава адвокатот.

Но од Општинатa не попуштаат под притисоците и реакциите во јавноста и велат дека акцијата нема да стагнира.

„Никој не може и не смее да биде над законите и интересите на Охрид. Денеска градежната механизација и работните екипи ангажирани од општина Охрид започнаа со активности за отстранување на платформите на плажите „Куба Либре“, „Кадмо“ и „Бела Виста“ кои се опфатени во Генералниот урбанистички план, но немаат договори за концесија. Исто така, во текот на наредните денови ќе се пристапи и кон отстранување на платформите и објектите на крајбрежјето на потегот кон населбата „Канео“. Угостителските објекти кои работат на овие плажи треба да престанат да извршуваат угостителска дејност надвор од законските процедури и да пристапат кон затворање на локалите" - пишуваат од локалната самоуправа.

Со последните акции продолжува расчистувањето на објектите на плажите, кое до неодамна беше најактивно пред Авто кампот „Елешец“ и плажата „Atlantic“, односно на плажите после хотелот „Метропол“.