Државната изборна комисија денеска на Стево Пендаровски му го врачи уверението за избран претседател на државата. Пендаровски утре напладне ќе даде свечена изјава во Собранието, а потоа ќе замине во претседателската вила на Водно. На седницата во Собранието, Пендаровски ќе даде свечена изјава пред пратениците, членовите на владата, верските лидери, првите луѓе на армијата, дипломатскиот кор и гости од странство.

Досега потврда за присуство на инаугурацијата на пендаровски пристигнала од бугарскиот претседател Румен Радев, од албанскиот претседател Илир Мета, од косовскиот претседател Хашим Тачи и од српскиот претседател Александар Вучиќ. Присутни ќе бидат и заменик премиерот на Турција и делегација од Словенија.

Покани за присуство на инаугурацијата преку министерството за надворешни работи се испратени до сите шефови на држави членки на НАТО и ЕУ. Пендаровски во ДИК изјави дека на вработените ќе им порача дека политичкиот реваншизмот треба да биде минато, а тој што се огрешил пред законот да одговара.