Вандализиран дигиталниот споменик на Григор Прличев во Охрид после само нецели 48 часа од неговото поставување. Непознати лица го пресекле доводот до електрична енергија, го отстраниле македонското знаме и ги искорнале написите.

Споменикот е времено надвор од функција, но активно работиме заедно со Општина Охрид на негово рестартирање како и со безбедносните служби за негова заштита од социопатите со кои за жал нашите деца го делат плоштадот, вели проф. д-р Анис Сефиданис креаторот на ова дело.

„После нецели 48 часа од промоцијата, паметниот споменик на Виртуелен Прличев кој години го работев со мојот тим и поддршка на Општина Охрид беше вандализиран и онеспособен од функција, се обиделе да ги отворат и металните врати за да стигнат до главниот компјутер, но поради цврстиот материјал и безбедносните брави успеале само искривувања да нанесат на истите, наведува професорот и додава дека случајот е веднаш пријавен во СВР Охрид, направен е увид и известено е Јавното обвинителство.

Од полицијата велат насилно се одземени 27 букви од дигиталиот споменик и македонското знаме.Откако го оштетиле го исклучиле од електричното напојување.

Граѓаните со остри осуди за ваквиот вандалски чин.

„Катастрофа, какво е ова однесување?'' Во Македонија има големо отсуство на општествена свест- почнувајќи од највисоките ешалони на општеството до најобичните граѓани, видиво е на секој чекор.

„И после сакаме во Европа, епа нема.Што народ ќе бевме,Некој вложил години труд знаење и финансии за некој за секунда да го уништи без трошка совест" -  се само дел од коментарите низ социјалните мрежи на револтирани охриѓани.

Инаку дигиталниот паметен споменик на Григор Прличев, вклучуваше и технологија за препознавање на говор на македонскиот јазик, како и високо реалистичен приказ на живописен аватар кој го претставува Прличев, синхронизиран со говор, кој ги отелотворува стиховите и емоциите на поетот.

За виртуелниот модел на ликот биле користени оригинални фотографии, автентични скулптури со примена на напредни методи на машинска  интелигенција за дигитална фотограметрија.