Охридската пастрмка на раб на истребување, трета година по ред нема ниту вештачки мрест
Foto

Охридската пастрмка на раб на истребување, трета година по ред нема ниту вештачки мрест

Охридската пастрмка е во се полоша состојба и на раб на истребување. Се повеќе се влошува нејзиниот и онака загрозен статус, предупредуваат експертите. 

Дополнително три години по ред, од 2019, 2020 и 2021 година не се врши вештачки мрест на ендемичниот вид риба во Хидробилошкиот завод, информира м-р Зоран Спиркоски од одделението за практично рибарство и аквакултура. 

Една од главните препреки зошто нема вештачки мрест е административна пречка во Програмата за рибарство и аквакултура. Таа се носи на крајот или на почетокот од новата година и не се поклопува со тајмингот на законската процедура во законот за јавни набавки за ангажирање на рибари која трае 70 дена, а мрестот стартува на 20 јануари, вели Спиркоски.

Како втора причина се наведува и неповолната хидролошка состојба со Билјанини извори. Водата е со влошен квалитет и намалена количина потребна за нивното мрестилиште.

Во Хидробиолошкиот институт, кој е основан во 1935 година, прекин на вештачкиот мрест на Охридската пастрмка претходно имало единствено во далечната 1942 и во 1998 година и за жал во последниве три години.

За лошата состојба во која се наоѓа пастрмката неодамна информираа и нуркачите од клубот „Амфора“ кои за време на нивните секојдневни подводни активности,сведочат за постојаното уништување на веќе значително осиромашениот рибен фонд на Охридското Езеро преку немилосрдното изловување и тоа во период кога пастрмката е најранлива и кога најмногу треба да се размножува.

0 Коментари

Остави коментари