Затвореници во Идризово копале подземен тунел од  60 метри со цел да избегаат.

Информацијата денеска во разговор за ТВ 24 ја потврди и првиот човек на Управата за извршување санкции Јовица Стојановиќ кој во кратките детали кои ги откри меѓу другото посочи дека веќе на терен имало и крим техника и служби кои работат на расчистување на случајот. 

Одговарајќи на новинарски прашања информацијата ја потврди и премиерот Ковачевски кој пак рече дека институциите дознале за ова и навремено реагирале, а разрешен е и досегашниот директор и именуван е генерал мајор Зоран Јовановски.

Неофицијално, почетокот на тунелот е од шеталиштето на затворениот дел на затворот, а водел до надвор односно до излезот.

Во овој дел на „Идризово“ има затвореници кои издржуваат високи казни, а меѓу нив има и такви осудени на доживотен затвор. Според првичните информации сето ова било правено со месеци, од страна на повеќе затвореници, распоредени во смени.