Нема пари за лекови за сите пациенти болни од цистична фиброза

8 пациенти во критична состојба. Итно е потребна терапија и за младите за да не прогресира болеста. 40 таблети на ден, доколку не се прима дополнителна антибиотска терапија. Дококу се работи за инфекција или воспаление има дополнителни апчиња медикаменти-доколку медикаментите немаат ефект се оди на хоспитализација и се прима инфузија.

Во меѓувреме се прават 3-4 инхалации и траат 60-90 минути. Во денот лицата со цистична фиброза одвојуваат 4-6часа за самата болест. Лицата со цистична фиброза, односно околу 130 лица, сѐ уште немаат никаков официјален одговор од надлежните за кога точно ќе ја добијат својата терапија-трикафта, вели Фики Гаспар. 

Гаспар додава дека финансиите се договараат со фирмата која ќе го произведува и дистрибуира. Информациите во однос на финансиите во другите држави варираат, има месечна терапија од 10илјади евра или пак 20илјади евра. Денеска пак, министерот Сали рече дека министерството за здравство може да финансира до 20 пациенти од одредена дијагноза, сѐ што е над 20 пациенти преминува во финансирање од страна на фондот за здравствено осигурување односно преку буџети од јавни здравствени установи. 

Асоцијацијата за цистична фиброза и нивни поддржувачи, пред неполн месец, на 26-ти декември излегоа на протест пред министерството за здравство. „За бифтеци има за лек нема“, „Наше право за лек е ваша обврска“ беа дел од транспарентите на тој протест, но се чини дека и натаму одекнуваат затоа што решение за проблемот нема. Очекуваат официјален одговор до крај на јануари, а тој одговор да биде со конструкција на решенија а не само со префрлување на вината. Доколку не се добие официјално решение ќе излезат на масовен протест, со цел да не заборават надлежните дека лицата со цистична фиброза се уште се тука и чекаат.