Народната банка направи умерена нагорна корекција на проекцијата за инфлација на 3,1 процент од априлските 2,2 проценти, а за следната година очекува таа да изнесува 2,4 проценти. И покрај енергетската криза и глобалниот раст на цените, засега не се очекуваат шокови. Според меѓународните финансиски институции, следната година треба да се стабилизира енергетскиот сектор.

Од Народната банка велат дека будно ја следат ситуацијата и доколку е потребно ќе се интервенира со инструментите што им стојат на располагање за да се задржи макроекономската стабилност.

Народната банка очекува закрепнување на македонската економија со раст од 3,9 проценти за оваа и за следната година, додека на среден рок се очекува умерено забрзување. Дефицитот се очекува да остане во умерени рамки на ниво од 3,8 проценти, а на среден рок да изнесува околу два проценти од БДП, слично на преткризното ниво.