Мицкоски: ВМРО-ДПМНЕ не беше дел од организацијата на протестите
Колнејќи се во својата чест и помалку збунет, лидерот на ВМРО-ДПМНЕ Христијан Мицкоски денеска во скопскиот Кривичен суд сведочеше за тоа што се случувало на 27 април 2017 година кога толпа народ упадна во Собранието.
Помалку зачуден од атмосферата во судницата Мицкоски на прашањата на одбраната одговараше кратко но и отсечно кога обвинителката Вилма Русковска го праша што барал пред вратите на Собранието а при тоа, како што рече тој, немал намера да влезе внатре. Тврдеше дека исто како и тој самиот и народот се самоорганизирал и невозможно е поранешните министри а во случајов обвинети Спиро Ристовски и Миле Јанакиески да биле организатори на протестите.
На прашање на судијката Дијана Груевска Илиевска дали мисли дека толкав број граѓани може да се самоорганизираат тој одговори дека ако која било структура ги организирала, тогаш ќе имало многу повеќе демонстранти на протестите.
Одговарајќи на новинарско прашање надвор од судницата, Мицкоски судскиот процес го оцени како сериозен и жесток и политички монтиран процес.
На сведочењето на лидерот на ВМРО-ДПМНЕ реагираше СДСМ. Го обвинија Мицкоски дека застанал зад Никола Груевски кој е и првообвинет во овој случај и му порачаа дека одговорност за насилството на 27. април ќе има. Покрај Мицкоски денеска на листата на сведоци беа и поранешниот вицепремиер Владимир Пешевски, поранешниот лидер на Унијата на млади сили Лука Кржаловски, а на списокот сведоци е и поранешната министерка за внатрешни работи Гордана Јанкулоска.
Освен Ристовски и Јанакиески, обвинети за организација на протестите од 27 април се и поранешниот претседател на Собранието Трајко Вељаноски и бившиот директор на УБК, Владимир Атанасовски. Обвинителството ги товари за терористичко загрозување на уставниот поредок и безбедноста.