Славниот виолински виртуоз Стефан Миленковиќ уште еднаш ја освои охридската публика, носејќи незаборавно музичко доживување во рамките на фестивалот „Охридско лето“.

Во автентичниот и мистичен амбиент на предворјето на црквата Света Софија, осветлена од  стотици свеќи, Миленковиќ приреди вистинско емотивно патување.​Централно место на репертоарот имаше ретко изведуваното и волшебно дело на англискиот композитор Ралф Вон Вилијамс, „The Lark Ascending“ – ремек-дело кое во оваа верзија и амбиент звучеше сосема уникатно.​За Миленковиќ, доаѓањето во Охрид одамна ги надмина границите на обичен професионален ангажман.

„Секој пат ми е задоволство кога сум овде и ова е дел од мојот живот- не е само некоја уметничка релација меѓу мене и Охрид.Вечерва имавме едно интересно дело за интерпретација од  Ралф Вон Вилијамс англиски композитор насловено како "Д Ларг Асендинг " единствено дело во својот жанр во верзија за виолина и камерен оркестар.И во атмосферата со свеќите и убавата црква света Софија се изгледа магично.Морам да кажам дека охридската публика е прекрасна.Македонија и Охрид имаат едно големо срце и отворена душа и тоа се чувствува секогаш кога настапувам овде луѓето не само што слушаат туку и ја доживуваат." - вели Стефан Миленковиќ виолинист.

Дека годинава уметноста масовно ги привлекува љубителите на културата потврдуваат и официјалните бројки на организаторите. Првиот човек на фестивалот, директор Ѓорѓи Цуцковски, со гордост истакнува дека ова издание на „Охридско лето“ бележи рекордна посетеност, а преполните гледалишта и распродадените билети за ваквите  концерти се најголемиот доказ дека квалитетот го наоѓа својот пат до публиката. 

Концертот на Миленковиќ уште еднаш ја потврди посебната врска помеѓу светскиот виртуоз и македонската публика, која со силни овации и длабока емоција го награди секој тон отсвирен под охридското небо. Магијата на класичната музика, споена со вековната историја на Света Софија и успешниот менаџмент на фестивалот, оставаат белег кој долго ќе се памети.