Лебот станува луксуз, цените до плафон, граѓаните едвај врзуваат крај со крај

И лебот станува луксуз за граѓаните.Во повеќето маркети ржаниот леб скокна на 93 денари, интегралниот на 84, а белиот на парчиња се продава по цена од над 50 денари.Нови цени и во пекарниците - сегашната цена од околу 70 ден за четвртина бурек може да достигне и до 100 денари во наредните недела две.Причината за ваквиот раст е поради неколкукратното поскапување на струјата и гасот.Граѓаните затекнати и исплашени од новиот бран на поскапувања особено кај основните продукти за прехрана.

Според Сојузот на синдикатите, цената на лебот за една година е зголемена за повеќе од 100 проценти. Велат работниците кои и покрај тоа што работат, од ден на ден се сѐ посиромашни поради тоа што инфлацијата изнесува 14,5 отсто. Тие сметаат дека Владата нема слух за потребите на граѓаните и работниците оти во услови на криза не презема никакви мерки.

„Синдикалната минимална кошница за една година е зголемена за 5.498,00 денари односно за 16 отсто, разликата меѓу просечната нето-плата и синдикалната кошница во 2022 година е 7.384 денари, цената на лебот за една година е зголемена за повеќе од 100 проценти, на маслото за јадење за 94 проценти, на горивата за 64,5 проценти, на електричната енергија за 9,4 проценти, на гасот за 64,6 отсто, а не е намалена на ниту еден производ или енергенс“, реагираат од ССМ.

Кога инфлацијата ќе достигне двоцифрена бројка тогаш излегува од контрола велат експертите и прогнозираат уште поголем раст и продлабочување на сиромаштијата во земјава.

Од пекарниците велат дека ова зголемување на белите пецива освен што се должи на растот на цената на струјата е  и поради повисоката откупна цена на житните кутури.Велат дека не им се исплати да работат, едвај успеваат да поделат плати на вработените кога енергенсите се неколкукратно зголемени а преговорите меѓу нив и Владата за поддршка на овој сектор се на стенд бај и се уште нема никаков конкретен епилог.