Лазаров: Вчера ги пофалив момците, денеска ќе им укажам на грешките
Foto

Лазаров: Вчера ги пофалив момците, денеска ќе им укажам на грешките

Машката ракометна репрезентација на Македонија со пораз од Словенија го отвори Европското првенство во Дебрецин. Првичните впечатоци на селекторот Кирил Лазаров беа позитивни, а по една проспана ноќ следува детална анализа и укажување на грешките.

„Намерно не го гледав натпреварот синоќа. Иако владее задоволство и  позитивна атмосфера многу работи што ги договаравме не ги исполнивме. А сепак бевме блиску до ривалот. Синоќа сакав да ги пофалам, но денес морам да им укажам на грешките. Сега имаме видео анализа и состанок и ќе разговараме. Не треба да ги понесат емоциите и треба да се фокусираме на договорот. Сепак, се работи за млада екипа и како поминува времето треба да станат победници и да научат како се победува. Тоа малку ме загрижува, бидејќи на договорени работи ние паднавме. Сепак, ми се допаѓа впечатокот, но тоа не смее да не успие. Сакам да бидеме уште подобри и да се дадеме задача како колектив да бидеме подобри против Црна Гора. Не треба да се оптоваруваме со противниците, туку да се концентрираме на себеси. Од нас зависи дали ќе остваруваме добри резултати во иднина или не. Противниците ќе бидат само појаки и појаки, бидејќи сите во Европа работат квалитетно. Фокус и концентрација е првото нешто што го барам од играчите. Ме водат и мене емоциите, но имавме премногу индивидуални грешки во краток период. И кај Кузмановски, и кај Талевски, и кај Ѓорѓиев, кај Велковски. Ќе им го пренесам ова на еден позитивен начин и тие треба тоа да си го стават во глава“, истакна селекторот Лазаров на денешниот брифинг.

Вториот натпревар во групата А Македонија го игра утре, во 18 часот против Црна Гора во "Феникс" арената во Дебрецин.

0 Коментари

Остави коментари