Кривични пријави против три девојки кои физички малтретираа малолетничка во Куманово, прво ја понижувале потоа физички ја нападнале.

Основното јавно обвинителство Куманово поведе постапка против една 18-годишна девојка, а за две малолетнички на возраст од 15 и 14 години е поднесено барање за поведување подготвителна постапка до судијата за деца при Основниот суд во Куманово, бидејќи заедно учествувале во дејствија на кривично дело – Насилство. 

ОЈО 

„На 13 март годинава тие повикале девојче кое тогаш имало 13 години да излезе од дома со нив и ја убедиле да влезе во запуштена просторија во близина на спортскиот центар ” Соколана”. Таму жртвата грубо ја навредувале и физички ја нападнале, удирајќи ја по лицето и телото. Насилството го снимале со телефон, а на нападнатото девојче му се заканиле по живот доколку каже некому за настанот. Јавното обвинителство, веднаш по објавата на видеото на социјалните мрежи презеде дејствија за обезбедување докази, а за полнолетната осомничена достави и предлог за определување мерки на претпазливост до надлежниот суд – задолжително јавување во судот, привремено одземање на патната исправа и забрана за приближување и воспоставување контакти со жртвата.“ - велат од ОЈО. 

Психолозите велат дека алармот е одамна вклучен но дека потребно е посериозен пристап во разрешување на ваквите насилства. Посочуваат дека потребно е да се размисли во која насока повозрасните влијаат врз малолетните и како општеството стана огледало во кое се отсликуваат контурите на возрасните.  

Дигиталната ера го трансформираше врсничкото насилство од изолиран инцидент во јавен чин. Психолозите и социолозите велат дека без системска интервенција, ваквите инциденти ќе продолжат да ја потресуваат јавноста, оставајќи трајни последици врз менталното здравје на младите генерации.