Полицијата поднесена кривична пријава против градоначалник на Делчево Горан Трајковски. Надворешната канцеларија за криминалистички работи на Делчево, го сомничи градоначалникот дека ја злоупотребил службената положба и овластување - вработувајќи административен службеник - кој ги исполнил условите за старосна пензија. 

Со незаконското вработување како што посочуваат од МВР - Трајковски по основ на исплатени придонеси и плата и нанел штета на општината - во износ од 762.318 денари 

- Пријавениот Г.Т. како овластено службено лице градоначалник на Општина Делчево на 01.08.2018 по јавен оглас од 25.06.2018 за вработување на административен службеник, злоупотребувајќи ја својата службена положба и овластување со пречекорување на границите на службената должност донел незаконска одлука за избор на кандидатот В.М. од Делчево, кој уште во првата фаза од постапката за вработување, како и во моментот на донесување на решението за стекнување на статус на административен службеник ги исполнувал законските услови да се стекне со право на пензиско и инвалидско осигурување со навршени 64 години старост, што претставува основа за престанок на работен однос на административен службеник, а не основа за вработување, информираат од МВР.

Градоначалникот на Делчево Трајковски кој доаѓа од редовите на СДСМ за ТВ 24 - вели дека позади кривичната пријава стои политички притисок - тактика која ја користат неговите политички противници од ВМРО-ДПМНЕ. Нема никаква основа за мое гонење - оти изборот за вработување по основ на бодови го врши друга институција, додава Трајковски.  

Минатиот месец полицијата поднесе кривична пријава и против градоначалникот на Крива Паланка Сашко Митовски - за злоупотреба на службена положба и овластување. Во пријавата стои дека градоначалникот не извршил контрола за сомнителна промена на инвеститор.

И Митовски исто од редовите на СДСМ пријавата ја дефинира како политички прогон пред избори.