Прогресивниот данок ќе се одложи и нема да стапи на сила од 1 јануари наредната година - дознава ТВ 24. Лебот, млекото и основните прехрамбени производи ќе останат со повластена стапка од 5% ДДВ, а со 10 проценти ќе се оданочува луксузната храна како и многу други производи од повластената листа.

А од први јануари граѓаните ќе плаќаат 10 наместо 5 проценти ДДВ за струјата. Ова се дел од деталите од најавената даночна реформа која министерството за финансии најверојатно ќе ја објави до крајот на неделава.

- Прогресивниот данок најверојатно ќе се одложи, бидејќи таков како што е не ги даде очекуваните ефекти и потребна е доработка. Листата на производи со повластена ставка на ДДВ ќе се скрати, но основните прехрамбени производи ќе останат со 5 проценти ДДВ. Таму има 217 ставки за храна каде влегуваат и некои полуксузни производи. На 10 проценти ДДВ ќе се оди на пример кај производи месо од ајкула, путер од кикирики, путер од кокос и други кои не знаеме како влегле на таа листа - брифираат владини извори.

Даночењњето на каматите на штедните влогови најверојатно ќе се одложи, а за реинвестираната добивка и капиталните приходи се бара најсоодветнио модел исто како и за плаќање на придонеси за хонорарците, кое најверојатно понатаму ќе се воведе но ќе биде со право на избор, брифираат нашите извори. 

Бизнисот пак апелираше дека не е време за даночни реформи и нови оптоварувања за компаниите на сред економска и енергетска криза. Дека на бизнисот, но и на инвеститорите во зоните им треба предвидливост, и јасна претстава што ќе се случува после Нова Година, согласни беа и вчерашните гости во Алнализа на ТВ 24.

Она што се знае е дека со даночната рефиорма, која треба да почне да се применува после нова година, во буџетот е планирано да се соберат 76 милиони евра. Вкупните даночни приходи во државната каса се проектирани на 2,6 милијарди евра, што е за 316 милиони евра повеќе пари од даноци од годинава. Дури 1,3 милијарди евра се од ДДВ, или 163 милиони евра повеќе од годинава.

ПРЕДЛОГ- БУЏЕТ ЗА 2023 ГОДИНА

ДАНОЧНИ ПРИХОДИ

ВКУПНО   2,6 милијарди евра ( + 316 милиони евра)   +13,6%

 ДДВ     1, 3 милијарди евра (+163 милиони евра)    +14,7%

ДЛД            431 милион евра (+63 милиони евра)          + 17,1%

Данок на добивка   239 милиони евра (+21 милион евра)

Придонеси     1,4 милијарди евра               + 12,1%