Кој е за а кој се плаши од референдумот. Зошто Да и зошто Не?  И денеска партиите во клинч откако вчера опозициската ВМРО-ДПМНЕ ја поднесе иницијативата за референдумското прашање за прекинување на важноста на договорот за добрососедство и пријателство со Бугарија.

Лидерот на ВМРО-ДПМНЕ Мицкоски и денеска на својот ф.б профил се огласи дека не се откажува од идејата за со референдумот да се организираат не само предвремени парламентарни туку и претседателски избори. Со порака и од неговата партија директно упатена до Бихаќка дека партијата на власт нема стратегија, но има страв да се соочи со граѓаните.

Од Бихаќка пак и денеска со контра став на Мицкоски дека на секој можен начин преку барања за  референдуми и избори се обидува да ја опструира државата но без конкретен одговор  како ќе се спротистават на овие политики и барања за референдум и дали ако истиот се одржи ќе го бојкотираат или ќе гласаат против. 

Најрано понеделник - најдоцна до вторник на полноќ ќе се знае судбината на иницијативата за референдум на опозициската ВМРО-ДПМНЕ откако вчера тие ја поднесоа до собранискиот спикер Џафери. Сега топката е токму во рацете на претседателот на законодавниот дом кој ќе треба да ја оцени уредноста на овој документ и барање за референдум за потоа да може да ја продолжи собраниската процедура.

Одлуката за ова покрај опозициската ВМРО ДПМНЕ ја чекаат и во Бихаќка каде на координација ќе одлучуваат како ќе постапат и кое од неколкуте сценарија е вистинското по кое понатаму ќе постапуваат.

Без целосно јасен став и коалициската ДУИ чии лидер Ахмети пак вчера само јасно порача дека лично тој не гледа потреба сега  од организирање на референдум.