Условни казни затвор од една година и шест месеци за пожарот во модуларната болница во Тетово за поранешните директори Флорин Бесими и Артан Етеми, ова значи дека тие остануваат на слобода, а ќе одат во затвор ако го повторат делото во наредните три години.

Судот го ослободи од обвинение докторот Бобан Вучевски, а клиничката болница Тетово ќе треба да плати еден милион денари отштета за делото „тешки дела против општата сигурност. Според одлуката на судот, Бесими и Етеми се виновни бидејќи не ја поставиле противпожарна опрема во модуларната болница. 

По судењето, Вучевски изрази благодарност до Тетовци кои пред секое рочиште протестираа и бараа да биде ослободен, додека Бесими најави жалба. 

Поранешниот економски директор Артан Етеми не се појави на денешното изрекување на пресудата. Пожарот во модуларната болница во Тетово се случи на 8 септември 2021 година кога загинаа 14 лица, а десетиан беа повредени. По пожарот, оставки поднесоа министерот за здравство Венко Филипче, а потоа и неговиот заменик Илир Хасани, но нивните оставки не беа прифатени од поранешниот премиер Зоран Заев.Судскиот процес за овој случај започна во декември минатата година.