Една милијарда евра нов долг, кој земјава ќе го враќа во следните осум години. Со нова еврообврзница државата повторно се задолжи. Задолжувањето е направено преку две транши од по 500 милиони евра. Едната со рок од четири години и камата од 3,87 отсто, а другата со рок од осум години и камата од 4,75 проценти. Со парите ќе се исплати еврообврзницата од 2020 година во износ од 700 милиони евра, а остатокот ќе се користи за буџетскиот дефицит и развојни проекти. Министерката за финансии Гордана Димитриеска-Кочоска се пофали дека осумгодишната еврообврзница, прва со таква рочност, е доказ за довербата на инвеститорите. Оценувајќи ги како историски најниски маргини, таа вели дека каматните услови се меѓу најповолните во регионот.

Од СДСМ велат дека новото задолжување не е успех, туку нужност поради, како што тврдат, длабок буџетски дефицит и недостиг на средства за редовно функционирање на државата.

„Под оваа сјајна фасада се крие сурова реалност, ова задолжување е директен одговор на проблемите со финансиите и буџетскиот дефицит. Оваа ‘доверба на инвеститорите’ што Владата ја слави, всушност е сигнал дека земјата мора да се задолжи по цена на зголемување на вкупниот долг, кој веќе надминува 60% од БДП според ЕУ-стандардите.“

Задолжувањето е неопходно, а рочноста и каматите не се лоши, смета универзитетскиот професор Борче Треновски. Сепак, тој според него загрижува висината и динамиката на јавниот долг. Најголем дел од буџетот оди за тековни расходи, а мал дел за продуктивни и развојни инвестиции, што може да го зголеми ризикот за враќање на долговите во услови на глобални финансиски шокови.

Пред крајот на минатата година, државата неколкупати се задолжи и на домашниот пазар, преку издавање државни хартии од вредност, како дел од стратегијата за обезбедување ликвидност и сервисирање на доспеаните обврски. Така, во следните пет години земјава треба да врати нешто над 8 милијарди евра долг.