Децата кои примиле три дози на ДиТеПер вакцината ќе може да посетуваат градинка, но под услов да се ревакцинираат за шест месеци. Растојанието помеѓу третата и четвртата доза се намалува на шест месеци, по препорака на лекарите и поради епидемијата во Скопје.

Комисијата за заштита од заразни болести ги ублажи мерките, откако контролите покажаа дека речиси половина од децата во скопските градинки се невакцинирани или нецелосно вакцинирани.

- Имаме разбирање и научна поткрепа дека овој малку олабавен начин и проценка на имунитетот со трите дози помага, но не знам до кога ќе остане, затоа што сега имаме над 170 заразени во Скопје и над 200 во држвава и веројатно тој број понатаму ќе расте, можно е во следниве недели да излеземе со построги епидемиолошки мерки, се зависи од развојот на ситуацијата. - вели проф. д-р Александар Петличковски претседател на Комисија за заштита од заразни болести

Сепак, и покрај олеснувањето на мерката, лекарите потенцираат дека детето нема да има целосен имунитет само со трите дози од вакцината и нагласуваат дека родителите треба да го следат календарот на имунизација и според него да ги вакцинираат децата.

- Под ризик ќе бидат доведени и возрасните, дете кое што ќе биде вака вакцинирано со три дози ќе биде заштитено но оптимално и далеку од тоа што треба да се постигне со три дози и две ревакцини и тоа дете понатаму треба да го сметаме да може да функционира но да знаеме дека епдиемијата на тој начин чќе добие и малку продолжен тек, затоа апелираме до родителите. - вели проф. д-р Александра Грозданова претседателка на Национален комитет за имунизација. 

Епидемиолошката состојба со пертусисот не е стабилна. Бројките на заразени и натаму растат и се очекува тој тренд да продолжи. Освен со ДиТеПер, алармантно низок е и опфатот со МРП вакцината.

Од комисијата велат ќе бараат од градинките поригорозни проверки на вакциналните картони, а во проверките да биде вклучена и вакцината против морбили, со оглед на тоа што дел од земјите во регионот прогласија епидемија на морбили, а истото и се заканува и на Македонија, поради ниската стапка на вакцинација.