Не чека ли дополнително зголемување на цената на лебот доколку цената на електричната енергија се зголеми?

Првиот човек на Регулаторната Комисија за Енергетика, Марко Бислимовски вели дека без потребната анализа не може да се каже колку точно ќе биде поскапувањето на електричната енергија на регулираниот пазар од први јули, но уверува дека нема да стане збор за ценовен шок и ги повика трговците и производителите да не прават злоупотреби со шпекулации.

Граѓаните пак велат, наместо да се намалуваат, за жал, речиси секој ден се затекнати од нови, сè повисоки цени на пазарот и од минатата недела купуваат бел леб поскап за околу 10%. 

Какви сметки ќе плаќаат граѓаните и малите бизниси останува да видиме од следниот месец. Сепак, дел од пекарите, кои не сакаа да дадат изјави, за 24 велат дека неминовно ќе биде поскапувањето бидејќи, според нив, секое зголемување на трошоците се знае како ќе се одрази врз цената.