Британските пратеници го отфрлија предлогот на премиерот Борис Џонсон за предвремени избори на 15 октомври.

Од вкупно 434 пратеници, 298 гласаа „за“ и 56 „против“.

Премиерот претрпе трет голем пораз за помалку од 24 часа, кога пратениците го отфрлија неговиот предлог за распуштање на парламентот и распишување предвремени избори.

Откако стана премиер во јули, Џонсон повеќе пати рече дека не сака предвремени избори, но,  го смени ставот откако вчера изгуби клучна битка околу неговиот план за брегзит без договор бидејќи парламентот усвои предлог-закон за блокирање на излезот од ЕУ без договор.

Тој предлог-закон беше донесен вечерва во Долниот дом.

По гласањето, тој рече дека законот „и дава контрола“ на Европската унија.

– Ова е закон со цел да се поништи најголемото демократско гласање во нашата историја, референдумот за 2016 година. Го принудува премиерот да се предаде во меѓународните преговори. Јас одбивам да го сторам тоа, рече премиерот на Велика Британија.