Британската амбасада потврди дека соработува со македонската влада за справување со нелегалната миграција. Како што велат од Амбасадата, по средбата меѓу премиерите Стармер и Мицкоски во мај, било договорено стратешко партнерство фокусирано на долгорочна политичка, економска и безбедносна рамка дизајнирана да ја продлабочи соработката и да ја зајакне стабилноста и просперитетот во двете земји.

„Како дел од ова, потпишаа партнерство меѓу владите за реализација на критични инфраструктурни проекти. Оваа соработка беше зајакната и од двајцата премиери на Берлинскиот процес, кој се одржа во октомври оваа година“ , објави Британската амбасада.

Британските медиуми пак вчера повторно ја отворија темата дека Македонија започнала формални преговори за прифаќање одбиени мигранти. Според написите, станува збор за лица на кои им е одбиено барањето за азил во Велика Британија. Од Владата негираат дека преговараат со Британија за прифаќање мигранти одбиени за азил.