Арсовска во СТУДИО 10: Локалната и централната власт не мора да се сакаат, но мора да работат за интересот на граѓаните

Оној што ќе ја води државата треба да си ги исполни ветувања, а дел од нив се поврзани со локалната самоуправа. Сметаме дека средствата ќе се распределуваат редовно и дека децентрализацијата ќе продолжи. Во овој момент Град Скопје има средства колку една рурална општина во Србија, тоа се 70-ина милиони денари, вели градоначалничката на Град Скопје, Данела Арсовска, во СТУДИО 10 на ТВ 24.

- Ние не мора да бидеме пријатели ни со Советот на Град Скопје, па ни со Владата но мораме да соработуваме во интерес на граѓаните, рече Арсовска на прашањето дали ќе му честита на Мицкоски на новата Влада.

Арсовска вели дека во изминатите две години било многу тешко, пред се поради енергетската криза при што некои општини ги исклучуваа уличните светла, но град Скопје не го стори тоа ставајќи ја безбедноста на граѓаните на прво место. Во една таква ситуација, помалите општини беа во ситуација да ја молат централната власт за помош, вели Арсовска и додава дека кога би се спровела фискалната децентрализација до тоа нема да дојде.

- Кај нас процентот од ДДВ и други даноци што се одвојуваат за локалната самоуправа е некаде околу 4 отсто, додека европската практика е најмалку 12 отсто па некаде и до една четвртина од прибраните средства, вели Арсовска и додава дека тие средства се одвојуваат за потребите на граѓаните.

Арсовска вели дека во Советот на Град Скопје мнозинството е на ВМРО-ДПМНЕ и дека и досега апелирала да гласаат во интерес на граѓаните, а меѓу проектите е изгласувањето на набавката на нови автобуси за градскиот превоз што веќе дваесет седници не се прави.

- Јас им понудив на советниците тие да одлучат во која банка ќе одат средствата и на кој начин ќе се спроведе тендерот за да нема обвинувања за лични интереси на градоначалничката, вели Арсовска и додава дека во 80 отсто од случаите во Советот нема расположение за гласање на предлозите на градоначалничката.

Во врска со новите еко автобуси, Арсовска вели дека нема ингеренции самата да донесе одлука за нивна набавка туку дека тоа е обврска на Советот. Таа додавата дека тие нови автобуси постепено ќе преминат во бесплатен градски превоз што беше едно од ветувањата и на Арсовска но и на ВМРО-ДПМНЕ.

- Може се да се каже дека е моја вина, но не е така, а граѓаните на крајот ќе сфатат кој е виновен за нереализираните проекти. А нереализирани проекти се оние кои се гласаат во Советот. И за „Бас рапид системот“ одлуката треба да ја донесе Советот. Штетата е за граѓаните кои заслужуваат да се возат во ефикасен и безбеден јавен превоз, а автобусите да доаѓаат на три минути, а не на половина час, вели Арсовска.

Арсовска вели дека на крајот советниците ќе треба да кажат што направиле за тие 500 евра месечен надомест за кој треба да дојдат на само една седница.