Се бројат на прсти компаниите кои пријавиле корупција, плашејќи се да не пропадне бизнисот или пак водејќи се со помислата дека системот нема ништо да реши и во случај да пријават.

Ова го покажуваат најновите резултати од Анкетата со приватниот бизнис сектор за за корупција, која ја спроведе Стопанската комора во март годинава, а се однесува на 2023 година. Централната власт е најголем подмитувач на бизнисот. Обидувајќи се индиректно да бара пари, процент од тендери, нечие вработување или унапредување, донација за политичка партија, подароци.. На меѓународното рангирање, Македонија е на 76-то место.

„Корупцијата некогаш го кородира општеството од внатре, така што прашање е и на национална сигурност, дали ќе имаме или немам безбедност. Со еден збор корупцијата е канцер на општетството. На пет компании им биле побарани над 100 000 евра, а од некои, кои учествувале на тендер, биле побарани 6-10% од износот на тендерот.“ - м-р Зоран Јовановски советник на претседателот на СКСМ.

Од оние компании што не прифатиле коруптивно барање, 48% се изјасниле дека имале последици врз бизнисот. 30% од компаниите сметаат дека ќе пропаднат ако не прифатат мито, 35 % велат дека прифаќањето би им помогнало. Дел од компаниите предлагаат да се зголемат казните за коруптивните дела. 

„Најмногу одговори се во постапка на добивање дозвола, одобрение и слично. При инспекциски надзор, при царинска, тендерска постапка. Има и една група на други одговори кои се во некаква друга постапка, даночна постапка, судска, катастарска. Нула одговори се добиени за постапка на Јавно обвинителство или постапка кога некој вршел ревизија-во таква постапка немало корумптивно барање.“ - вели Јовановски.

Анкетата е спроведена во март, електронски, а се однесува на 2023 година. Одговориле 138 компании, од кои 75 целосно, на сите прашања. Седиштата на компаниите кои одговориле, се во 25 општини низ државата, главно урбани, а работат во 48 дејности. Две тртетини се фокусирани на домашниот пазар, а една третина се извозници, но вклучени биле и фирми кои не се членки на Комората.