24 СТОРИЈА: МАЈКА И СИН ОД ВЕЛЕС ЖИВЕАТ ВО УЖАСНИ УСЛОВИ, БЕЗ ОГРЕВ И РЕЧИСИ БЕЗ ХРАНА И ЛЕКОВИ
Foto

24 СТОРИЈА: МАЈКА И СИН ОД ВЕЛЕС ЖИВЕАТ ВО УЖАСНИ УСЛОВИ, БЕЗ ОГРЕВ И РЕЧИСИ БЕЗ ХРАНА И ЛЕКОВИ

Оваа одаја која повеќе личи на пештера отколку на соба, вчера беше местото каде што Велешанецот Јордан Јованов го прослави својот именден и 40 ти роденден. Но, немаше славеничка песна, ниту радост во неговиот дом. Јордан нема пријатели. Ниту колеги од работа. Единствениот другар е неговата неподвижна мајка Ангелина, овие четири мувлосани ѕидови и подот кој почнал да се поткопува до земја. Студот е секојдневието за овие луѓе. За да заштедат од дрвцата кои им останале, старото ќумбе го палат попладне. До тогаш, 75 годишната Ангелина седи во ладно. Се грее со термофор и шише топла вода в раце. Јордан го трпи студот. Сиромаштија не е вистинскиот збор да се опише животот на овие луѓе – туку беда.

Мајката и синот живеат со 11 илјади денари, кои ги добиваат од државата како нега и надомест за намалена мобилност. Пред 15 години Ангелина преживеала тежок мозочен удар кој ја врзал за кревет. Вистинско чудо е што досега сум жива, вели, едвај изговарајќи ги зборовите од уста.

Јордан својот живот го посветил на грижа за својата болна мајка. Неизмерно ја сака и не сака да помисли да се раздели од неа. Ниту е оженет, ниту пак во последните 15 години, по мозочниот удар на мајка си, знае што е забава. Поради обрските кон неа, не може ниту да работи.Од дома излегува еднаш месечно. Да плати комуналии и од тоа што ќе остане од парите, да купи нешто за јадење. Никогаш не задоцнил со плаќање на сметките за струја и вода. Но, никогаш и не се пријавил во социјалните институции, за да добие социјална помош. Низ солзи раскажува дека итно му е потребна помош за огрев, оти дрва веќе нема. Сметката му е блокирана, откако пред повеќе години некој го насамарил да му биде жирант за кредит, кој никогаш не бил платен. Ова семејство е вистински тест за државата, која себе си се нарекува социјална. На потег се институциите, кои треба да најдат трајно решение за овие луѓе, но и хуманите граѓани, кои барем малку можат да го ублажат страдањето на мајката и синот од Велес.

Контакт: Јордан Јованов 074 600 659

0 Коментари

Остави коментари