Кошаркарите на Црвена ѕвезда завршија на најлошата позиција која води во плеј-ин разигрувањето на Евролигата, откако после вистинска драма загубија од актуелниот европски шампион Панатинаикос на негов терен. Грците победија со 111-104, откако во регуларниот дел мечот заврши нерешено, 96-96, а „црвено-белите“ имаа +8 во самиот финиш, односно водство од 86-94.

Тоа значи дека Црвена ѕвезда за место во најдобрата осумка во Евролигата ќе игра најпрво против Баерн Минхен, а доколку успее да помине, тогаш во „финалето“ ќе игра против поразениот од дуелот на Реал Мадрид и Париз.

Регуларниот дел на првата позиција го заврши Олимпијакос со 24 победи, една повеќе од Фенербахче, додека третата позиција му припадна на Панатинаикос. Во првата шестка завршија и Монако, Барселона и Анадолу Ефес.